हिमायतनगर पोलिसांची माणुसकी! चौपाटी परिसरात दारू पिऊन रस्त्यावर पडलेल्या व्यक्तीला आमच्या नाईट पेट्रोलिंग टीमने पोहोचवले ग्रामीण रुग्णालयात
हिमायतनगर ( तालुका प्रतिनिधी शेख खय्यूम): दिनांक १८ जून २०२६ रोजी रात्री जेव्हा संपूर्ण शहर गाढ झोपेत होते, तेव्हा हिमायतनगर पोलीस ठाण्याचे आमचे नाईट पेट्रोलिंग पथक (रात्रगस्त टीम) शहरात गस्त घालत होते.
रस्त्यावर पडलेल्या व्यक्तीला तात्काळ मदत
शहरातील चौपाटी परिसरात गस्त घालत असताना आमच्या पथकाला एक व्यक्ती दारू पिऊन रस्त्यावर झोपलेली दिसून आली. रात्रीच्या ड्यूटीवर तैनात असलेले हिमायतनगर पोलीस ठाण्याचे कर्तव्यदक्ष पोलीस कर्मचारी हजेरी मेजर नवाब खान युसूफ खान पठाण यांनी तात्काळ त्या व्यक्तीला उठवले आणि शासकीय वाहनातून थेट हिमायतनगर ग्रामीण रुग्णालयात पोहोचवले.
”पीऊन पडला असला तरी तो एक माणूस आहे!” – हजेरी मेजर नवाब खान पठाण
रुग्णालयात पोहोचताच हजेरी मेजर नवाब खान पठाण यांनी स्वतः तत्परतेने तिथल्या डॉक्टरांशी चर्चा केली आणि “यांच्यावर तातडीने ट्रीटमेंट सुरू करा” असे सांगितले. डॉक्टरांनीही तातडीने दखल घेत त्या व्यक्तीला तात्काळ सलाईन लावून पुढील उपचार सुरू केले.
यावेळी आपली प्रतिक्रिया देताना हजेरी मेजर नवाब खान पठाण म्हणाले की, “एखादी व्यक्ती दारू पिऊन रस्त्यावर पडलेली असली, तरी अखेर तो एक माणूस आहे. अशा असहाय्य माणसाला सुरक्षित ठिकाणी नेऊन त्याच्यावर उपचार करणे हे आमचे कर्तव्यच आहे.” त्यांच्या या मानवतावादी भूमिकेने नागरिकांची मने जिंकली आहेत.
पोलीस प्रशासनाचे सर्वत्र कौतुक
ही संपूर्ण कामगिरी पोलीस निरीक्षक लक्ष्मण केंद्रे यांच्या खंबीर मार्गदर्शनाखाली हजेरी मेजर नवाब खान पठाण व आमच्या रात्रगस्त पथकाने यशस्वीरित्या पार पाडली. पोलिसांच्या या संवेदनशीलतेमुळे त्या व्यक्तीला वेळेत वैद्यकीय मदत मिळाली असून, सध्या संपूर्ण तालुक्यातून हिमायतनगर पोलिसांच्या या कामगिरीचे कौतुक होत आहे.
