दिव्यांग बांधवाचा स्वावलंबनासाठी पुढाकार; हिमायतनगर नगरपंचायतीकडे व्यावसायिक जागेची मागणी

​हिमायतनगर (तालुका प्रतिनिधी शेख खयुम): “आम्हाला कोणाच्या खैरातीची गरज नाही, फक्त सन्मानाने जगण्यासाठी संधी द्या,” असा आदर्श वस्तुपाठ शहरातील रहिम कॉलनी येथील रहिवासी अब्दुल कलीम शेख सरवर यांनी प्रशासनासमोर ठेवला आहे. त्यांनी नगरपंचायतीकडे कायदेशीर ५% दिव्यांग आरक्षणांतर्गत व्यावसायिक गाळा किंवा स्टॉल मिळण्यासाठी अधिकृत निवेदन सादर केले आहे.
​शासकीय नियम आणि तरतुदी:
भारतीय राज्यघटनेच्या मार्गदर्शक तत्त्वांनुसार आणि ‘दिव्यांगजन अधिकार अधिनियम २०१६’ नुसार स्थानिक प्रशासनावर काही जबाबदाऱ्या सोपवण्यात आल्या आहेत:
​५% आरक्षण: नगरपंचायतीच्या शॉपिंग कॉम्प्लेक्स आणि मार्केटमध्ये ५% जागा दिव्यांगांसाठी राखीव ठेवणे बंधनकारक आहे.
​भाडे सवलत: दिव्यांगांना देण्यात येणाऱ्या गाळ्यांसाठी बाजारभावापेक्षा कमी आणि सवलतीचे मासिक भाडे आकारण्याचे स्पष्ट निर्देश आहेत.
​प्राधान्य: ५५% दिव्यांगत्व असलेल्या अब्दुल कलीम यांनी स्वतःहून शासनाचे सवलतीचे भाडे आणि अनामत रक्कम भरण्याची तयारी दर्शवली आहे, जेणेकरून ते स्टेशनरी किंवा जनरल स्टोअर सुरू करून आत्मनिर्भर होऊ शकतील.
​प्रशासनाकडून अपेक्षा:
नगरपंचायत हिमायतनगरच्या आवक-जावक विभागात हे निवेदन (दिनांक १०/०४/२०२६) दाखल करण्यात आले आहे. शहराच्या मुख्य बाजारपेठेत किंवा मोकळ्या जागेत स्टॉल लावण्यास लेखी परवानगी (NOC) मिळाल्यास, एका दिव्यांग कुटुंबाला हक्काचा रोजगार मिळेल. आता यावर मुख्याधिकारी काय सकारात्मक पाऊल उचलतात, याकडे संपूर्ण तालुक्याचे लक्ष लागले आहे.