हिमायत नगर: नगरसेवक जिशान मिर्झा यांचा धडाका; प्रभाग ८ स्वच्छतेसह प्रकाशाने उजळला!
हिमायतनगर (तालूका प्रतिनिधी शेख खयुम):
येथील प्रभाग क्रमांक ८ चे नगरसेवक जिशान मिर्झा यांनी विकासकामांचा नवा उच्चांक प्रस्थापित केला असून, आगामी सण-उत्सवांच्या पार्श्वभूमीवर प्रभागाचा कायापालट केला आहे. पवित्र रमजान महिना आणि महाशिवरात्रीच्या पावन पर्वावर नागरिकांना कोणत्याही समस्येचा सामना करावा लागू नये, यासाठी मिर्झा यांनी रात्रंदिवस एक करून प्रभागात सुविधांचा पाऊस पाडला आहे.
महिलांच्या सोयीसाठी विशेष प्राधान्य
रमजानच्या महिन्यात महिलांना सहरीच्या तयारीसाठी पहाटे लवकर उठावे लागते. गल्लीबोळातील अंधारामुळे महिलांना आणि मशिदीत जाणाऱ्या भाविकांना त्रास होऊ नये, यासाठी जिशान मिर्झा यांनी संपूर्ण प्रभागात हाय-व्होल्टेज बल्ब आणि नवीन पथदिवे बसवून लख्ख प्रकाश केला आहे. या प्रकाशयोजनेमुळे माता-भगिनींमध्ये सुरक्षिततेची भावना निर्माण झाली असून त्यांच्या या कामाचे सर्वत्र कौतुक होत आहे.
स्वच्छतेवर दिला भर; कचरा आणि नाल्यांची सफाई
केवळ प्रकाशच नाही, तर आरोग्याच्या दृष्टीनेही मिर्झा यांनी कंबर कसली आहे. “जनता सांगते, तेच काम आम्ही करतो” या ब्रीदवाक्याला जागत त्यांनी प्रभागातील साचलेला कचरा पूर्णपणे हटवला असून नाल्यांची सखोल स्वच्छता केली आहे. दुर्गंधी आणि अस्वच्छतेचे साम्राज्य संपवून त्यांनी प्रभागाला चकाचक केले आहे.
”जनतेची सेवा हीच आमची खरी इबादत आहे. रमजान आणि महाशिवरात्रीच्या काळात माझ्या प्रभागातील एकही गल्ली अंधारात राहणार नाही आणि कोठेही कचरा दिसणार नाही, हा माझा शब्द होता आणि तो मी पूर्ण केला आहे.”
— जिशान मिर्झा, नगरसेवक
या ‘धडाकेबाज’ कामगिरीमुळे प्रभाग ८ मधील नागरिकांमध्ये आनंदाचे वातावरण आहे. नगरसेवकांच्या या तत्परतेमुळे आणि सर्वधर्मसमभावाच्या भूमिकेमुळे संपूर्ण शहरात जिशान मिर्झा यांच्या नावाचा डंका वाजत आहे.
