उमरखेड–टाकळी राजापूर रस्त्यासाठी आठ तरुणांचे आमरण उपोषण

• मुख्यमंत्री ग्राम सडक योजनेतील रखडलेले काम, अपघातांच्या वाढत्या घटनांमुळे गावकरी आक्रमक

सहसंपादक शेख मुजाहिद

उमरखेड, दि. 24 जानेवारी 2026 पासून टाकळी राजापूर (ता. उमरखेड) येथील आठ तरुणांनी उपविभागीय अधिकारी कार्यालय, उमरखेड येथे आमरण उपोषणास सुरुवात केली आहे. आज उपोषणाचा दुसरा दिवस असूनही प्रशासनाकडून कोणताही ठोस निर्णय न झाल्याने गावकऱ्यांमध्ये तीव्र नाराजी व्यक्त होत आहे.
मुख्यमंत्री ग्राम सडक योजनेअंतर्गत उमरखेड–टाकळी राजापूर रस्त्याचे काम मागील दोन ते तीन वर्षांपासून रखडलेले आहे. रस्त्याची अवस्था अत्यंत खराब असून त्यामुळे सतत अपघात होत आहेत, अनेक नागरिक जखमी झाले आहेत. या परिस्थितीमुळे त्रस्त झालेल्या ग्रामस्थांनी एकाच रस्त्यासाठी दुसऱ्यांदा आमरण उपोषणाचा मार्ग स्वीकारला आहे.
उपोषणकर्त्यांच्या प्रमुख मागण्या
मोजा टाकळी राजापूर ते उमरखेड रस्त्याचे अपूर्ण काम तात्काळ पूर्ण करण्यात यावे.
रस्त्याच्या कामाचा कालावधी संपून सहा महिने उलटूनही काम पूर्ण न झाल्याने संबंधित कंत्राटदार व अधिकाऱ्यांची चौकशी करून त्यांच्यावर कायदेशीर कारवाई करण्यात यावी अश्या मागण्या आहे.
रस्त्याच्या दुरवस्थेमुळे झालेल्या अपघातग्रस्तांना तात्काळ मदत देण्यात यावी.
या मागण्या पूर्ण झाल्याशिवाय उपोषण मागे घेणार नसल्याचा ठाम निर्णय उपोषणकर्त्यांनी जाहीर केला आहे.
आमरण उपोषणकर्ते –
जनार्दन सुरोशे, योगेश भालेराव, कृष्णा चंद्रवंशी, राजू कदम, गजानन कदम, गजानन चंद्रवंशी, सुनील चव्हाण, नितीन शिंदे व समस्त टाकळी राजापूर ग्रामस्थ.
उपोषणस्थळी अभियंता चौधरी, कंत्राटदार जयंत वसंतराव चिद्दरवार, गोपाल भाऊ अग्रवाल, अ‍ॅड. संतोष जैन, दत्तरावजी शिंदे तसेच अनेक कार्यकर्ते व नागरिकांनी भेट दिली. मात्र सायंकाळपर्यंत कोणताही तोडगा निघालेला नाही.
प्रजासत्ताक दिनाच्या पार्श्वभूमीवरही उपोषण सुरूच राहणार का, की प्रशासन तात्काळ निर्णय घेणार, याकडे संपूर्ण तालुक्याचे लक्ष लागले आहे.