हिमायतनगर शासकीय उपजिल्हा रुग्णालयाच्या वैद्यकीय अध्यक्षपदी वाळके यांची निवड; ढासळलेली आरोग्य व्यवस्था सुधारण्याचे आव्हान

हिमायतनगर (तालुका प्रतिनिधी शेख खय्यूम) : शहरातील शासकीय उपजिल्हा रुग्णालयाच्या वैद्यकीय अध्यक्षपदी वाळके यांची निवड करण्यात आली आहे. त्यांच्या निवडीमुळे रुग्णालयातील वैद्यकीय सेवा आणि प्रशासनाच्या कामकाजात सुधारणा होईल, अशी अपेक्षा व्यक्त होत असतानाच, गेल्या काही वर्षांपासून रुग्णालयाच्या उपचार व्यवस्थेबाबत नागरिकांकडून उपस्थित केल्या जाणाऱ्या प्रश्नांकडेही आता लक्ष लागले आहे.
रुग्णालयातील कर्मचाऱ्यांची शिस्त, वेळेवर उपस्थिती, रुग्णांशी योग्य वर्तन आणि उपचार व्यवस्थेतील समन्वय या बाबींवर प्रभावी नियंत्रण ठेवण्याचे मोठे आव्हान नव्या वैद्यकीय अध्यक्षांसमोर असणार आहे. रुग्णांना शासकीय रुग्णालयात योग्य, वेळेवर आणि आवश्यक उपचार मिळणे ही प्रशासनाची मूलभूत जबाबदारी आहे.
गेल्या काही वर्षांपासून उपचार व्यवस्थेबाबत नागरिकांकडून नाराजी व्यक्त केली जात असल्याचे बोलले जाते. रुग्णांना आवश्यक सेवा वेळेत मिळतात का, कर्मचाऱ्यांकडून जबाबदारीने कर्तव्य पार पाडले जाते का आणि रुग्णालयातील उपलब्ध सुविधांचा योग्य वापर होतो का, याकडे नागरिकांचे लक्ष असणार आहे.
नवीन वैद्यकीय अध्यक्ष या जबाबदारीचे योग्य पालन करून रुग्णालयातील बेशिस्तीवर नियंत्रण आणतील का? रुग्णांची होणारी कथित हेळसांड थांबवून उपचार व्यवस्थेला पुन्हा शिस्त लावण्यात त्यांना यश मिळेल का? याकडे हिमायतनगरकरांचे लक्ष लागले आहे.
त्याचबरोबर, उपजिल्हा रुग्णालयाच्या मंजुरीनुसार ३० खाटांची पूर्ण क्षमता, तज्ज्ञ डॉक्टरांची पदे, अत्याधुनिक वैद्यकीय उपकरणे आणि २४ तास आपत्कालीन सेवा शासनाकडून मंजूर करून आणण्यासाठी नवनिर्वाचित अध्यक्ष पाठपुरावा करणार का, हीदेखील त्यांची खरी कसोटी ठरणार आहे. वाळके यांच्या कार्यकाळात रुग्णालयाचा कारभार प्रत्यक्ष रुपात किती सुधारतो, हे आगामी काळात स्पष्ट होईल.