Uncategorized
उमरखेडच्या लेकीचा राष्ट्रीय झेंडा उंचावला वीरा बंग हिला ‘ज्युनिअर मिस इंडिया’चा मानाचा मुकुट
- उमरखेडच्या कन्येने देशपातळीवर आपल्या प्रतिभेचा ठसा उमटवत मानाचा मुकुट आपल्या शिरपेचात रोवला आहे. बंग परिवाराची कन्या वीरा मुकेश बंग हिने ‘ज्युनिअर मिस इंडिया २०२६’ (८ ते १० वयोगट – सांस्कृतिक फेरी) हा प्रतिष्ठेचा किताब पटकावत उमरखेडसह संपूर्ण नागपूर जिल्ह्याचा गौरव वाढवला आहे.
- अवघ्या ९ वर्षांची वीरा बंग ही उमरखेड येथील डॉ. मुकेश बंग व डॉ. स्मिता बंग यांची कन्या असून, राधेश्यामजी बंग व पद्मावती बंग यांची नात आहे. ती सध्या भवन्स बी. पी. विद्यालय, आष्टी (नागपूर) येथे इयत्ता चौथीत शिक्षण घेत आहे.
- ज्युनिअर मिस इंडिया २०२६ ही जगातील सर्वात मोठ्या बालिकांसाठीची प्रतिष्ठित स्पर्धा मानली जाते. ही स्पर्धा ६ ते ८ जानेवारी २०२६ दरम्यान जयपूर (पिंक सिटी) येथे पार पडली. देशभरातून निवड झालेल्या १७२ स्पर्धकांनी अंतिम फेरीत सहभाग घेत आपल्या संस्कृतीचे, आत्मविश्वासाचे व व्यक्तिमत्त्वाचे सादरीकरण केले.
- सांस्कृतिक फेरीत वीरा बंग हिने हिंदू संस्कृतीतील आदिशक्ती ‘देवी काली’चे प्रभावी रूप साकारत परीक्षकांचे लक्ष वेधून घेतले. स्त्रीशक्ती, आत्मसन्मान व धैर्याचे प्रतीक असलेल्या देवी कालीच्या सादरीकरणातून
- “प्रत्येक स्त्रीमध्ये कालीची शक्ती दडलेली आहे; सन्मानाला आव्हान मिळाल्यास ती अग्नीसारखी उभी राहते,”
- हा सशक्त संदेश तिने अत्यंत प्रभावीपणे मांडला.
- आपल्या आत्मविश्वासपूर्ण सादरीकरण, बुद्धिमत्ता, करिष्मा व सशक्त अभिनयाच्या जोरावर वीरा बंग हिने हा बहुमान पटकावत महाराष्ट्र व नागपूरचे राष्ट्रीय पातळीवर प्रतिनिधित्व केले.
- या घवघवीत यशाबद्दल वीरा बंग हिचे सर्व स्तरांतून अभिनंदन होत असून, तिच्या उज्ज्वल भविष्यासाठी शुभेच्छांचा वर्षाव केला जात आहे. ही कामगिरी उमरखेडसाठी अभिमानास्पद असून, अनेक बालकांसाठी प्रेरणादायी दीपस्तंभ ठरणारी आहे.
