भोकर-नांदेड महामार्गावरील सिताखांडी घाटात भीषण अपघात; ट्रक-मॅजिकच्या धडकेत १० ते ११ प्रवाशांचा जागीच मृत्यू!

तालुका प्रतिनिधी शेख खय्यूम )
​नांदेड: भोकर-नांदेड महामार्गावरील अत्यंत धोकादायक मानल्या जाणाऱ्या सिताखांडी घाटात आज एक अत्यंत भीषण आणि काळजाचा ठोका चुकवणारा अपघात घडला. भरधाव वेगाने येणाऱ्या एका ट्रकाने समोरून येणाऱ्या ‘मॅजिक’ प्रवासी वाहनाला जोरदार धडक दिली. ही धडक इतकी भीषण होती की मॅजिक वाहनाचा पार चक्काचूर झाला असून, यामध्ये १० ते ११ प्रवाशांचा जागीच दुर्दैवी मृत्यू झाला. या घटनेमुळे संपूर्ण हिमायतनगर आणि भोकर तालुक्यात तीव्र शोककळा पसरली आहे.
​मुदत संपलेल्या वाहनांची बेकायदेशीर सुसाट वाहतूक
या भीषण दुर्घटनेनंतर प्रादेशिक परिवहन विभाग (RTO) आणि पोलीस प्रशासनाच्या दुर्लक्षावर नागरिकांनी तीव्र संताप व्यक्त केला आहे. रस्त्यावर धावणाऱ्या अनेक ‘मॅजिक’ आणि इतर खाजगी वाहनांचे फिटनेस प्रमाणपत्र (Fitness Certificate) कित्येक महिन्यांपूर्वीच संपलेले आहे. तरीही कोणतीही परवानगी नसताना ही वाहने खुलेआम रस्त्यावर धावत आहेत. अधिक कमाईच्या हावेपोटी क्षमतेपेक्षा दुप्पट प्रवासी कोंबून बेफाम वेगाने गाड्या पळवल्या जात असल्याने प्रवाशांचे जीव धोक्यात आले आहेत.
​बेफाम ट्रक आणि घाटातील रस्ता बनला ‘मृत्यूचा सापळा’
सिताखांडी घाटातील नागमोडी आणि धोकादायक वळणांवर नियंत्रणाबाहेर धावणारे अवजड ट्रक आणि अनधिकृत प्रवासी वाहने यामुळे हा रस्ता आता ‘मृत्यूचा सापळा’ बनला आहे. घाटात कोणत्याही सुरक्षेच्या उपाययोजना नसणे आणि प्रशासनाचे नियम तोडणाऱ्यांवर कारवाई न करणे, यामुळेच आज निष्पाप प्रवाशांना आपला जीव गमवावा लागला आहे.
​प्रशासनाला संतप्त सवाल
या भीषण अपघातात १० ते ११ बळी गेल्यानंतर तरी आरटीओ आणि पोलीस प्रशासन जागे होणार का? मोटर वाहन कायद्यानुसार मुदत संपलेल्या गाड्या जप्त करून, दोषी चालकांवर कठोर गुन्हे दाखल केले जातील का, असा सवाल आता नागरिक विचारत आहेत.
​नागरिकांच्या प्रमुख आणि आक्रमक मागण्या:
​अवैध वाहनांवर तात्काळ जप्ती: मुदत संपलेल्या (Fitness Expired) आणि रस्ते वाहतुकीस अयोग्य असणाऱ्या सर्व मॅजिक व खाजगी वाहनांवर तात्काळ जप्तीची कारवाई करून ती कायमची बंद करण्यात यावीत.
​परवाने रद्द अन् गुन्हे दाखल: ओव्हरलोडिंग आणि धोकादायक पद्धतीने गाडी चालवणाऱ्या चालकांवर सदोष मनुष्यवधाचे गुन्हे दाखल करून त्यांचे ड्रायव्हिंग लायसन्स कायमस्वरूपी रद्द करण्यात यावेत.
​घाटात सुरक्षा उपाययोजना: सिताखांडी घाटातील धोकादायक वळणांवर तात्काळ मजबूत गतिरोधक (Speed Breakers), दिशादर्शक फलक आणि रिफ्लेक्टर्स बसवून सुरक्षेची कडक अंमलबजावणी करण्यात यावी.