भुतडा यांच्या उमेदवारी अर्जावेळी उत्तमराव इंगळे कुठे?
माजी आमदार इंगळे यांना डावलल्याची चर्चा; उमरखेड-महागाव मतदारसंघात राजकीय चर्चांना उधाण

महागाव प्रतिनिधी : संजय नागरगोजे
महागाव : यवतमाळ जिल्हा मध्यवर्ती सहकारी बँकेच्या निवडणुकीत महागाव तालुका गटातून नितीन भुतडा यांनी उमेदवारी अर्ज दाखल करताना माजी आमदार प्रकाश पाटील देवसरकर, ससाने, खडसे तसेच विद्यमान आमदार किसन वानखेडे यांची उपस्थिती पाहायला मिळाली. मात्र, या शक्तिप्रदर्शनाच्या छायाचित्रात भाजपचे माजी आमदार उत्तमराव इंगळे यांची अनुपस्थिती राजकीय वर्तुळात चर्चेचा विषय ठरली आहे.
उमेदवारी अर्ज दाखल करतानाच्या छायाचित्रात भाजपमधील प्रमुख नेत्यांची उपस्थिती दिसून येत असताना, पक्षाचे कट्टर समर्थक म्हणून ओळखले जाणारे उत्तमराव इंगळे यांना या कार्यक्रमापासून का दूर ठेवण्यात आले, असा सवाल आता उंबरखेड-महागाव विधानसभा मतदारसंघात चर्चिला जात आहे.
विशेषतः आगामी पंचायत समिती व जिल्हा परिषद निवडणुकांच्या पार्श्वभूमीवर या अनुपस्थितीकडे राजकीय दृष्टिकोनातून पाहिले जात आहे. उंबरखेड-महागाव मतदारसंघात आदिवासी समाजाचे मोठे मतदान असून, या समाजाशी संबंधित राजकीय समीकरणांमध्ये उत्तमराव इंगळे यांची भूमिका महत्त्वाची मानली जाते. त्यामुळे आगामी स्थानिक स्वराज्य संस्थांच्या निवडणुकीत भाजपला त्यांच्या नेतृत्वाची गरज आहे की नाही, असा प्रश्न राजकीय कार्यकर्त्यांमध्ये उपस्थित होत आहे.
दरम्यान, नितीन भुतडा यांच्या उमेदवारी अर्जावेळी माजी आमदार देवसरकर, ससाने, खडसे आणि आमदार किसन वानखेडे यांची एकत्रित उपस्थिती दिसल्याने भाजपच्या अंतर्गत राजकीय समीकरणांबाबतही तर्क-वितर्कांना उधाण आले आहे.
उत्तमराव इंगळे यांना या कार्यक्रमापासून का वगळण्यात आले? हा केवळ योगायोग होता की त्यामागे काही राजकीय संदेश दडलेला आहे? याबाबत सध्या कोणतेही अधिकृत स्पष्टीकरण समोर आलेले नाही. मात्र, या अनुपस्थितीची चर्चा उंबरखेड-महागाव मतदारसंघातील राजकीय वर्तुळात चांगलीच रंगली आहे.
आगामी पंचायत समिती व जिल्हा परिषद निवडणुकांमध्ये या घडामोडीचा भाजपच्या स्थानिक राजकारणावर काय परिणाम होतो, हे पाहणे औत्सुक्याचे ठरणार आहे.