अतिवृष्टीत कापूस पिकाचे नुकसान; चुकीच्या अहवालाचा आरोप, शेतकऱ्यांची नुकसानभरपाईची मागणी
महागाव, प्रतिनिधी : संजय नागरगोजे
महागाव तालुक्यातील कोंनदरी येथील शेतकरी उत्तमराव चव्हाण यांच्या कापूस पिकाचे २९, ३० व ३१ जुलै रोजी झालेल्या अतिवृष्टीमुळे मोठ्या प्रमाणावर नुकसान झाल्याचा दावा करण्यात आला आहे. मात्र, प्रत्यक्ष नुकसान झाले असतानाही कृषी व महसूल विभागाने शासनाकडे नुकसान झाले नसल्याचा अहवाल पाठविल्याचा आरोप शेतकऱ्यांनी केला आहे. संबंधित वृत्त प्रसिद्ध झाल्यानंतर तालुक्यातील शेतकऱ्यांमध्ये तीव्र नाराजी व्यक्त होत आहे.
शेतकऱ्यांचे म्हणणे आहे की, चुकीच्या अहवालांमुळे महागाव तालुक्यातील अनेक नुकसानग्रस्त शेतकरी शासनाच्या मदत व नुकसानभरपाईपासून वंचित राहण्याची शक्यता आहे. त्यामुळे तातडीने प्रत्यक्ष पाहणी करून नव्याने पंचनामे करण्यात यावेत आणि वस्तुनिष्ठ अहवाल शासनाकडे पाठवावा, अशी मागणी करण्यात येत आहे.
यासंदर्भात शेतकऱ्यांनी ३ ऑगस्ट २०२६ रोजी तहसीलदारांना निवेदन देऊन नुकसानग्रस्त शेतकऱ्यांना तातडीने आर्थिक मदत व नुकसानभरपाई देण्याची मागणी केली आहे.
दरम्यान, अतिवृष्टीनंतरही आमदार, खासदार किंवा इतर लोकप्रतिनिधींनी बाधित भागाचा दौरा न केल्याचा आरोप काही शेतकऱ्यांनी केला असून, त्यामुळे शेतकऱ्यांमध्ये नाराजीचे वातावरण असल्याचे सांगितले जात आहे.
शेतकऱ्यांनी महसूल व कृषी विभागामार्फत तातडीने पंचनामे करून शासनाकडे अचूक अहवाल सादर करावा आणि पात्र शेतकऱ्यांना त्वरित मदत मिळवून द्यावी, अशी मागणी केली आहे.
