हिमायतनगर (तालुका प्रतिनिधी शेख खय्यूम):
राजकारणात मतभेद असू शकतात, पक्षांतरही होऊ शकते. एखादा नेता काँग्रेसमधून भाजपमध्ये जाऊ शकतो किंवा इतर कोणत्याही पक्षात प्रवेश करू शकतो. तो त्याचा वैयक्तिक राजकीय निर्णय असतो. मात्र, एकाच वेळी दोन भूमिका घेणे हे कार्यकर्ते आणि जनतेच्या मनात प्रश्न निर्माण करणारे ठरते.
जर एखादी व्यक्ती सार्वजनिकरित्या स्वतःला काँग्रेसची असल्याचे सांगत असेल आणि दुसरीकडे भाजपच्या नेत्यांशी राजकीय साटेलोटे ठेवत असेल, तर सामान्य कार्यकर्त्यांच्या मनात संभ्रम निर्माण होणे स्वाभाविक आहे. पक्षनिष्ठा ही केवळ नावापुरती नसून विचारसरणी, धोरणे आणि कार्यकर्त्यांप्रती असलेल्या बांधिलकीतून दिसून यायला हवी.
हिमायतनगरच्या राजकारणातही अशाच चर्चांना उधाण आले आहे. काही जण स्वतःला काँग्रेसी म्हणवून घेत असताना भाजपच्या उमेदवारांना मतदान केल्याच्या चर्चा जनतेमध्ये सुरू आहेत. त्यामुळे खऱ्या अर्थाने पक्षासाठी वर्षानुवर्षे काम करणाऱ्या कार्यकर्त्यांच्या भावना दुखावल्या जात आहेत.
लोकशाहीत प्रत्येकाला आपली राजकीय भूमिका निवडण्याचा अधिकार आहे. परंतु ती भूमिका स्पष्ट आणि प्रामाणिक असावी, अशी अपेक्षा जनतेची असते. एकीकडे काँग्रेसचा दावा करायचा आणि दुसरीकडे भाजपशी जवळीक ठेवायची, ही दुहेरी भूमिका कितपत योग्य आहे, याचा विचार संबंधितांनी करणे गरजेचे आहे.
जनता सर्व पाहत असते. आजच्या काळात कोण कोणासोबत आहे, कोणाची राजकीय भूमिका काय आहे आणि कोण कोणत्या विचारसरणीशी प्रामाणिक आहे, हे जनतेला समजत असते. त्यामुळे राजकारणात पारदर्शकता आणि स्पष्ट भूमिका हाच जनतेचा विश्वास जिंकण्याचा खरा मार्ग आहे.
हिमायतनगरमध्ये काँग्रेसची विचारधारा मानणारे अनेक निष्ठावान कार्यकर्ते आहेत. त्यांना अपेक्षा आहे की पक्षाशी संबंधित प्रत्येकाने आपली भूमिका स्पष्ट ठेवावी. कारण शेवटी जनतेसमोर सत्य लपून राहत नाही आणि जनतेचा कौल हा नेहमीच प्रामाणिकपणाला मिळत असतो.
