प्रगतिशील शेतकरी विनोद मैंद यांना “शेतकरी निष्ठ पुरस्कार”; परिसरातून अभिनंदनाचा वर्षाव
महागाव प्रतिनिधी संजय नागरगोजे
महागाव तालुक्यातील उटी गावचे भूमिपुत्र, प्रगतिशील व प्रयोगशील शेतकरी तसेच सर्वांचे सहकारी मित्र श्री. विनोद मैंद यांना कृषी क्षेत्रातील उल्लेखनीय कार्याबद्दल शासनाचा प्रतिष्ठित “शेतकरी निष्ठ पुरस्कार” प्रदान करण्यात आला आहे. या उल्लेखनीय यशाबद्दल त्यांच्यावर सर्व स्तरांतून अभिनंदनाचा वर्षाव होत आहे.
श्री. मैंद यांनी नाविन्यपूर्ण शेती पद्धतींचा अवलंब करून आधुनिक तंत्रज्ञानाच्या मदतीने शेतीत यशस्वी प्रयोग राबविले आहेत. तसेच त्यांनी शेतकरी बांधवांना सातत्याने मार्गदर्शन करून त्यांना प्रगत शेतीच्या दिशेने नेण्याचे महत्त्वपूर्ण कार्य केले आहे. त्यांच्या अथक परिश्रम, शेतीविषयक सखोल ज्ञान आणि निःस्वार्थ सेवाभावामुळे अनेक शेतकरी आधुनिक व शाश्वत शेतीकडे वळले असून शेती क्षेत्रात नवे आदर्श निर्माण झाले आहेत.
त्यांना प्राप्त झालेला हा सन्मान त्यांच्या कार्याची पोचपावती असून कृषी क्षेत्रातील त्यांच्या योगदानाचा गौरव आहे. भविष्यातही त्यांच्या हातून शेतकरी हिताचे असेच उल्लेखनीय कार्य घडत राहो, अशा सदिच्छा व्यक्त करत परिसरातील शेतकरी, सामाजिक कार्यकर्ते व विविध क्षेत्रातील मान्यवरांनी त्यांचे मनःपूर्वक अभिनंदन केले आहे.
