निकृष्ट दर्जाच्या कामामुळे रस्ता धोकादायक; अधिकाऱ्यांची टोलवाटोलवी, नागरिक संतप्त
महागाव प्रतिनिधी संजय नागरगोजे
महागाव ते फुलसावंगी या महत्त्वाच्या रस्त्याच्या कामात झालेल्या प्रचंड गैरव्यवहारावर लोकायुक्तांनी स्पष्ट आदेश देऊनही प्रशासनाने केवळ चौकशीचा “फार्स” रचल्याचा संतापजनक प्रकार समोर आला आहे. निकृष्ट दर्जाच्या कामामुळे रस्ता अक्षरशः खड्ड्यांच्या खाईत बदलला असून, प्रवाशांच्या जीवाशी खेळ सुरू असल्याचा आरोप नागरिकांनी केला आहे.
या प्रकरणी जनआंदोलन आधार संघर्ष समितीचे संस्थापक अध्यक्ष जगदीश नरवाडे यांनी गंभीर आरोप करत सांगितले की, लोकायुक्तांच्या आदेशानंतरही अधिकाऱ्यांनी चौकशी प्रक्रियेला केवळ दिखावा बनवला आहे. संबंधित अधिकाऱ्यांनी तक्रारदारांचे म्हणणे ऐकून घेण्याऐवजी टोलवाटोलवी करत वेळ मारून नेल्याचे उघड झाले आहे.
दरम्यान, क्वालिटी कंट्रोल अधिकाऱ्यांनी प्रत्यक्ष पाहणी केली असली तरी ती पूर्णपणे अपारदर्शक पद्धतीने पार पडल्याचा आरोप होत आहे. अधिक माहिती देण्यासाठी गेलेल्या नरवाडे यांना अधिकाऱ्यांनी टाळाटाळ करत मागील दरवाजातून निसटल्याची धक्कादायक बाब समोर आली आहे. दोन वेळा संपर्क करूनही अधिकाऱ्यांनी कोणताही प्रतिसाद दिला नाही.
या रस्त्याच्या कामात मोठ्या प्रमाणावर भ्रष्टाचार झाल्याचा संशय व्यक्त होत असून, अल्पावधीतच रस्ता उखडून निघाला आहे. ठिकठिकाणी मोठे खड्डे पडल्याने अपघातांची मालिका सुरू आहे. फुलसावंगी-कोल्ही दरम्यानच्या पुलाचे बांधकामही धोकादायक स्थितीत असल्याने नागरिकांमध्ये भीतीचे वातावरण आहे.
“रस्त्यावर खड्डे की खड्ड्यांत रस्ता?” अशी संतप्त प्रतिक्रिया नागरिकांनी व्यक्त केली आहे. केवळ कागदोपत्री चौकशी करून भ्रष्ट अधिकाऱ्यांना वाचवण्याचा प्रयत्न सुरू असल्याचा आरोपही होत आहे.
नरवाडे यांनी मागणी केली आहे की, या प्रकरणाची स्वतंत्र आणि निष्पक्ष चौकशी करण्यात यावी, दोषी अधिकारी व ठेकेदारांवर तात्काळ कठोर कारवाई करून त्यांच्याकडून नुकसानभरपाई वसूल करावी. तसेच रस्त्याची तातडीने दुरुस्ती करून नागरिकांच्या जीविताचा प्रश्न मार्गी लावावा.
आता लोकायुक्त कार्यालय यावर ठोस भूमिका घेणार का, की पुन्हा एकदा भ्रष्टाचारावर पांघरूण घातले जाणार? असा सवाल उपस्थित होत असून संपूर्ण तालुक्याचे लक्ष या प्रकरणाकडे लागले आहे.
