नांदेड विधान परिषद निवडणूक: हिमायतनगरसह जिल्ह्यात विक्रमी ९९.७८% मतदान, ६ केंद्रांवर १००% वोटिंग

​हिमायतनगर (तालुका प्रतिनिधी शेख खय्यूम ):
नांदेड स्थानिक प्राधिकारी मतदार संघाच्या विधान परिषद निवडणुकीसाठी काल जिल्ह्यात ऐतिहासिक ९९.७८% मतदान नोंदवले गेले. एकूण ४५२ मतदारांपैकी ४५१ लोकप्रतिनिधींनी आपल्या मतदानाचा हक्क बजावला, ज्यामुळे केवळ एक मत कमी पडले. निवडणूक प्रशासनाने केलेल्या कडक बंदोबस्तात सर्व ८ केंद्रांवर शांततेत मतदान पार पडले.
​६ केंद्रांवर १००% मतदान, महिला आघाडीवर
या निवडणुकीचे मुख्य वैशिष्ट्य म्हणजे जिल्ह्यातील एकूण ८ मतदान केंद्रांपैकी ६ केंद्रांवर १००% (शत-प्रतिशत) मतदान झाले. नेहमीप्रमाणे यंदाही महिला लोकप्रतिनिधींचा उत्साह पुरुषांच्या तुलनेत अधिक पाहायला मिळाला.
​३५ मतदारांनी घेतला साहाय्यकाचा आधार
कायदेशीर तरतुदींचा वापर करत एकूण ३५ मतदारांनी साहाय्यकाच्या (Assistant) मदतीने आपले मत नोंदवले. राजकीय वर्तुळात यावर मोठी चर्चा सुरू आहे, कारण या ३५ मतदारांमध्ये २९ निरक्षर नगरसेवकांचा समावेश होता. यामागे भाजपची विशेष रणनीती असल्याच्या चर्चांना उधाण आले आहे.
​काँटे की टक्कर आणि ‘व्हिप’चा ससेमिरा
या हाय-प्रोफाइल जागेवर महायुतीचे अमर राजूरकर आणि महाविकास आघाडीचे (काँग्रेस) कृष्णा पाटील आष्टीकर यांच्यात थेट आणि चुरशीची लढत होत आहे. मतदानाच्या पार्श्वभूमीवर काँग्रेसने आपल्या सर्व नगरसेवकांना ‘व्हिप’ जारी केला होता. मतदान प्रक्रिया संपल्यानंतर माजी मुख्यमंत्री अशोक चव्हाण यांनी महायुतीचे उमेदवार मोठ्या मताधिक्याने विजयी होतील, असा विश्वास व्यक्त केला आहे. हिमायतनगर नगरपंचायतीसह संपूर्ण जिल्ह्यातील स्थानिक नेत्यांची प्रतिष्ठा या निवडणुकीत पणाला लागली असून आता सर्वांचे लक्ष लागून राहिले आहे ते मतमोजणी आणि अंतिम निकालाकडे.