मुडाणा परिसरात ‘तोतया लाईनमन’चा वावर?
गरीब-गरजू ग्राहकांची फसवणूक केल्याचा आरोप; शेतकऱ्यांकडून तक्रार

महागाव प्रतिनिधी संजय नागरगोजे
महागाव तालुक्यातील मुडाणा परिसरात एक व्यक्ती स्वतःला महावितरणचा लाईनमन असल्याप्रमाणे वावरत असल्याची तक्रार नागरिकांकडून करण्यात आली आहे. संबंधित व्यक्ती महावितरणचा अधिकृत कर्मचारी आहे किंवा नाही, याबाबत नागरिकांमध्ये संभ्रम निर्माण झाला असून, या प्रकरणाची वरिष्ठ अधिकाऱ्यांनी चौकशी करण्याची मागणी होत आहे.
संबंधित व्यक्तीकडून गरीब व सर्वसामान्य वीज ग्राहकांकडून वीज बिलाच्या नावाखाली पैसे स्वीकारले जात असल्याचा आरोप करण्यात आला आहे. तसेच शेतकऱ्यांच्या विद्युत लाईनमध्ये बिघाड झाल्यास तो दुरुस्त करून देण्याच्या नावाखाली पैसे मागितले जात असल्याची तक्रारही काही शेतकऱ्यांनी केली आहे.
लाईनमन म्हणून काम करण्याचा अधिकार कोणी दिला?
महावितरणचा अधिकृत कर्मचारी नसलेल्या व्यक्तीला विद्युत वाहिनी किंवा विद्युत यंत्रणेवर काम करण्याची परवानगी आहे का? ग्राहकांच्या तक्रारी हाताळण्याचा तसेच दुरुस्तीच्या नावाखाली पैसे स्वीकारण्याचा अधिकार त्याला कोणी दिला, असा सवाल नागरिकांकडून उपस्थित केला जात आहे.
संबंधित व्यक्ती महावितरणचा लोगो असलेला गणवेश किंवा ड्रेस वापरत असल्यास, तो वापरण्याची परवानगी कोणत्या अधिकाऱ्यांनी दिली, याचीही चौकशी करण्याची मागणी होत आहे.
महावितरणने अधिकृत खुलासा करावा
सदर व्यक्ती महावितरणचा कर्मचारी आहे किंवा नाही, त्याला विद्युत लाईनवर काम करण्याची अधिकृत परवानगी आहे का, ग्राहकांकडून वीज बिल अथवा दुरुस्तीच्या नावाखाली पैसे स्वीकारण्याचा अधिकार आहे का, तसेच महावितरणचा लोगो असलेला गणवेश वापरण्याबाबत कोणतीही अधिकृत परवानगी देण्यात आली आहे का, याबाबत महावितरणच्या वरिष्ठ अधिकाऱ्यांनी स्पष्ट खुलासा करावा, अशी मागणी नागरिकांकडून करण्यात येत आहे.
दखल न घेतल्यास ४ ऑक्टोबरला चक्काजामचा इशारा
या तक्रारीची तातडीने दखल घेऊन चौकशी व योग्य कारवाई करण्यात आली नाही, तर ४ ऑक्टोबर २०२६ रोजी नागपूर–तुळजापूर महामार्गावर मुडाणा परिसरात चक्काजाम आंदोलन करण्यात येईल, अशी पूर्वसूचना नागरिकांच्या वतीने देण्यात आली आहे.
गरीब, सर्वसामान्य वीज ग्राहक तसेच शेतकरी वर्गाची आर्थिक फसवणूक होऊ नये, यासाठी महावितरणच्या वरिष्ठ अधिकाऱ्यांनी संपूर्ण प्रकरणाची निष्पक्ष चौकशी करून वस्तुस्थिती जनतेसमोर स्पष्ट करावी, अशी मागणी होत आहे.