वेणी परिसरातील पत्त्यांच्या क्लबवर कारवाईची मागणी वेणी परिसरात खुलेआम पत्त्यांचे क्लब सुरू? शेतकरी, नागरिकांची लूट थांबवण्याची मागणी सामाजिक कार्यकर्त्याचे पोलीस अधीक्षकांकडे निवेदन; पत्त्यांचे डाव तातडीने बंद करण्याची मागणी
महागाव : प्रतिनिधी संजय नागरगोजे
वेणी परिसरात खुलेआम पत्त्यांचे क्लब व जुगाराचे डाव सुरू असल्याचा आरोप करत, शेतकरी व सर्वसामान्य नागरिकांची आर्थिक लूट थांबवण्यासाठी तातडीने कारवाई करावी, अशी मागणी एका सामाजिक कार्यकर्त्याने यवतमाळ जिल्ह्याचे पोलीस अधीक्षक यांच्याकडे केली आहे.
वेणी परिसरात पत्त्यांच्या माध्यमातून पैशांचा जुगार सुरू असल्याने अनेक नागरिक आर्थिक अडचणीत सापडत असल्याचा दावा निवेदनातून करण्यात आला आहे. विशेषतः शेतकरी वर्गाला या प्रकाराचा फटका बसत असून, कष्टाने मिळवलेला पैसा अशा डावांमध्ये गमावला जात असल्याचे सामाजिक कार्यकर्त्याचे म्हणणे आहे.
‘डाव बंद करा’, नागरिकांची मागणी
वेणी येथे सुरू असल्याचे सांगितले जाणारे पत्त्यांचे डाव तातडीने बंद करून संबंधित ठिकाणी पोलिसांनी छापेमारी करावी. तसेच जुगार सुरू असल्याचे आढळल्यास आयोजक व सहभागी व्यक्तींवर कायद्यानुसार कठोर कारवाई करावी, अशी मागणी निवेदनातून करण्यात आली आहे.
पोलिसांच्या भूमिकेकडे लक्ष
या प्रकाराची पोलिसांनी गांभीर्याने दखल घेऊन वेणी परिसरातील संशयित ठिकाणांची तपासणी करावी आणि जुगाराचे डाव सुरू असल्याचे निष्पन्न झाल्यास तत्काळ कारवाई करावी, अशी मागणी करण्यात आली आहे.
वेणी परिसरातील पत्त्यांचे डाव नेमके कुठे, कोणाच्या माध्यमातून आणि किती दिवसांपासून सुरू आहेत, याची चौकशी होणार का, याकडे आता नागरिकांचे लक्ष लागले आहे.
