वेल्डिंग करताना भीषण स्फोट! उमरखेड हादरले; दोन जणांचा मृत्यू, अनेक जखमी

विहिरीच्या ब्लास्टिंगसाठी वापरले जाणारे स्फोटक ट्रॅक्टरमध्ये असल्याची प्राथमिक माहिती; वेल्डिंगदरम्यान स्फोट झाल्याचा दावा

शहरात स्फोटकांनी भरलेले वाहन आलेच कसे? पोलिसांच्या तपासणीवर गंभीर प्रश्न; घटनास्थळी पंचनामा व तपास सुरू


उमरखेड शहरातील ढानकी रोडवरील बैल बाजारासमोर असलेल्या किसान वेल्डिंग वर्कशॉपमध्ये व संजीरी फर्निचर मार्ट शनिवार, दि. 26 सप्टेंबर 2026 रोजी सकाळी सुमारे 11.25 वाजता भीषण स्फोट झाल्याची घटना घडली. या घटनेने संपूर्ण उमरखेड शहर हादरले असून, प्राथमिक माहितीनुसार दोन जणांचा मृत्यू झाल्याचे सांगण्यात येत असून अनेक जण गंभीर व किरकोळ जखमी झाले आहेत. गंभीर जखमींना पुढील उपचारासाठी नांदेड येथे रेफर करण्यात आल्याची माहिती आहे.
ट्रॅक्टरमध्ये स्फोटक असल्याची प्राथमिक माहिती
प्राथमिक माहितीनुसार, विहिरीच्या ब्लास्टिंगसाठी वापरल्या जाणाऱ्या साहित्याशी संबंधित एक ट्रॅक्टर वेल्डिंगच्या कामासाठी उमरखेड शहरात आला होता. संबंधित ट्रॅक्टरमध्ये ब्लास्टिंगसाठी वापरले जाणारे स्फोटक पदार्थ असल्याची माहिती समोर आली आहे. वेल्डिंगचे काम सुरू असताना स्फोटक पदार्थाबाबत वेल्डिंग करणाऱ्या व्यक्तीस योग्य माहिती देण्यात आली होती की नाही, याबाबतही प्रश्न उपस्थित झाले आहेत.
वेल्डिंगच्या प्रक्रियेदरम्यान आर्थिंग/विद्युत स्पार्क झाल्यानंतर अचानक मोठा स्फोट झाल्याचे प्रत्यक्षदर्शींकडून सांगण्यात येत आहे. मात्र, स्फोट नेमका कोणत्या पदार्थामुळे झाला, स्फोटक कोठे ठेवण्यात आले होते, ते अधिकृत परवानगीचे होते का आणि सुरक्षा नियमांचे पालन झाले होते का, याचा तपास होणे आवश्यक आहे.
दोन जणांचा मृत्यू? अनेक जखमी
प्राथमिक माहितीनुसार या दुर्घटनेत शेख शहेबाज अनिस खान (वय 14, रा. उमरखेड) आणि अविनाश केशव बेले (वय 30, रा. वाळदी) यांचा मृत्यू झाल्याची माहिती समोर आली आहे. मात्र, मृत्यूबाबतची अंतिम अधिकृत पुष्टी संबंधित वैद्यकीय व पोलीस यंत्रणेकडून होणे बाकी आहे.
गंभीर जखमींमध्ये उमर शेख अनीस खान (17), शेख बशीर शेख अनिस (40), साजिद खान रशीद खान (52), अप्पाराव बोक्षे व त्यांचा मुलगा वैभव आप्पाराव बोक्षे (20), शेख जावेद शेख बाबू (19) यांच्यासह अन्य व्यक्तींचा समावेश असल्याची प्राथमिक माहिती आहे. गंभीर जखमींना नांदेड येथे उपचारासाठी हलविण्यात आल्याचे सांगण्यात येते.
तर सय्यद जोहान सय्यद युनूस (14), गौसोद्दीन सय्यद फारूक (22), सलमान खान शेर खान (34), शेख समर शेख उस्मान (42) आणि सय्यद अल्तमश सय्यद कबीर (16) यांना किरकोळ दुखापत झाल्याची प्राथमिक माहिती आहे. यातील काही जखमींना उपचारानंतर डिस्चार्ज देण्यात आल्याचे समजते.
जखमी व मृतांची अंतिम संख्या तसेच सर्वांची वैद्यकीय स्थिती अधिकृत पोलीस व रुग्णालयीन नोंदीतून स्पष्ट होणे अपेक्षित आहे.
पोलिसांची धावपळ; घटनास्थळी पंचनामा सुरू
घटनेची माहिती मिळताच उमरखेडचे उपविभागीय पोलीस अधिकारी (SDPO) व उमरखेड पोलीस प्रशासन घटनास्थळी दाखल झाले. परिसरात बंदोबस्त लावण्यात आला असून, घटनास्थळाच्या आजूबाजूची वाहतूक काही काळ थांबवून पंचनामा व प्राथमिक तपासाची कार्यवाही सुरू करण्यात आली. त्याचप्रमाणे नगरपरिषदेचे अग्निशमन दल सुद्धा घटनास्थळी हजर झाले आहे.
स्फोटाचे नेमके कारण, घटनास्थळी कोणते पदार्थ होते, ते कोणी आणले, त्यासाठी परवानगी होती का, संबंधित व्यक्तींकडे आवश्यक परवाने होते का आणि सुरक्षा उपाययोजना करण्यात आल्या होत्या का, याबाबत पोलीस तपास करीत आहेत.
घटनेची माहिती मिळताच
जिल्हा पोलीस अधीक्षक व विस्फोटक विभाग सुद्धा घटनास्थळी तपासणीकरिता हजर झाले आहे.
सामान्य दुचाकी तपासली जाते; मग स्फोटक वाहून नेणारा ट्रॅक्टर का नाही?
या घटनेनंतर उमरखेड शहरातील नागरिकांकडून पोलिसांच्या तपासणी यंत्रणेवर गंभीर प्रश्न उपस्थित केले जात आहेत. सामान्य नागरिकांची दुचाकी, चारचाकी वाहने तपासली जात असताना विहिरीच्या ब्लास्टिंगसाठी वापरले जाणारे स्फोटक साहित्य घेऊन जाणाऱ्या वाहनांची तपासणी कोणत्या पद्धतीने केली जाते?
शहरात अशा प्रकारचे स्फोटक साहित्य असलेले वाहन प्रवेश करत असेल तर त्याची नोंद, तपासणी आणि वाहतुकीसाठी आवश्यक परवानग्या तपासल्या जातात का? संबंधित विभागाकडे या वाहनाच्या हालचालीची माहिती होती का? जर माहिती होती तर प्रतिबंधात्मक कारवाई का झाली नाही आणि माहिती नव्हती तर गुप्तवार्ता व तपासणी यंत्रणा नेमकी कुठे होती? असे प्रश्न नागरिक उपस्थित करीत आहेत.
बाजारपेठेत किंवा गर्दीच्या ठिकाणी घटना घडली असती तर?
सुदैवाने ही घटना वेल्डिंग वर्कशॉपमध्ये घडली. मात्र, याच प्रकारचे स्फोटक साहित्य शहरातील बाजारपेठ, शाळा, धार्मिक स्थळ किंवा अन्य गर्दीच्या परिसरात असते आणि तिथे दुर्घटना घडली असती तर त्याचे परिणाम किती गंभीर झाले असते, याची चर्चा नागरिकांमध्ये सुरू आहे.
उमरखेड तालुक्यात अशा प्रकारची गंभीर घटना प्रथमच घडल्याचे नागरिकांचे म्हणणे आहे. त्यामुळे केवळ स्फोटाचा तपास करून प्रकरण संपविण्याऐवजी स्फोटक साहित्याची वाहतूक, साठवणूक, परवाने, वाहनाची तपासणी, वेल्डिंग वर्कशॉपमध्ये केलेले काम आणि संबंधित विभागांच्या परवानग्यांची सखोल चौकशी करण्याची मागणी होत आहे.
ट्रॅक्टरला शहरात प्रवेशाची परवानगी होती का?
शहरातील नागरिकांचा आणखी एक महत्त्वाचा सवाल म्हणजे, स्फोटक साहित्य वाहून नेणाऱ्या ट्रॅक्टरला उमरखेड शहरात प्रवेश कसा मिळाला? संबंधित वाहनाला शहरात येण्यासाठी आवश्यक परवानगी होती का?
या संपूर्ण प्रकरणात पोलीस प्रशासन, महसूल विभाग, स्फोटक पदार्थांशी संबंधित सक्षम प्राधिकरण तसेच स्थानिक प्रशासनाची जबाबदारी नेमकी काय होती, हे तपासातून स्पष्ट होणे गरजेचे आहे.
अधिकारी गप्प का?
इतकी गंभीर घटना घडूनही घटनेचे नेमके कारण, स्फोटक पदार्थाचा प्रकार, संबंधितांकडे असलेली परवानगी आणि पुढील कायदेशीर कारवाई याबाबत अधिकृत प्रतिक्रिया अद्याप स्पष्टपणे समोर आलेली नाही, अशी नागरिकांमध्ये चर्चा आहे.
या प्रकरणात दोषी व्यक्ती कोण आहे हे तपास पूर्ण होण्यापूर्वी ठरविणे योग्य ठरणार नाही. मात्र, ज्यांच्या निष्काळजीपणामुळे ही घटना घडली असल्याचे तपासात निष्पन्न होईल, त्यांच्यावर लागू कायद्यांनुसार कठोर कारवाई झाली पाहिजे, अशी नागरिकांची मागणी आहे.
‘स्फोटकांची वाहतूक आणि साठवणूक’ तपासाचा केंद्रबिंदू ठरणार?
या घटनेचा तपास करताना पोलिसांनी केवळ वेल्डिंगच्या ठिणगीपर्यंत मर्यादित न राहता—
– स्फोटक पदार्थ नेमका कोणता होता?
– तो कोणी खरेदी केला?
– संबंधितांकडे वैध परवाना होता का?
– स्फोटकाची वाहतूक कोणत्या वाहनातून व कोणत्या मार्गाने करण्यात आली?
– वाहनाची तपासणी कोणत्या यंत्रणेने केली?
– शहरात स्फोटक साहित्य आणण्यास कोणती परवानगी आवश्यक होती?
– वेल्डिंग वर्कशॉपमध्ये स्फोटक साहित्य का ठेवण्यात आले?
– सुरक्षा नियमांचे पालन झाले होते का?
– संबंधित ठेकेदार/व्यक्ती व वाहनमालकाची जबाबदारी काय?
– यापूर्वी अशा प्रकारे स्फोटकांची वाहतूक झाली होती का?
या सर्व बाबींची चौकशी होणे अत्यावश्यक आहे.
उमरखेड हादरवून सोडणाऱ्या या घटनेमागचे खरे कारण तपासातून समोर येणार का आणि स्फोटकांच्या वाहतुकीपासून ते वेल्डिंगच्या ठिकाणी त्याच्या उपस्थितीपर्यंत जबाबदार असलेल्या प्रत्येकाची भूमिका निश्चित होणार का, याकडे आता संपूर्ण तालुक्याचे लक्ष लागले आहे.