*

उमरखेड
आषाढी एकादशीच्या पावन आणि पवित्र पर्वावर श्री शिवाजी माध्यमिक व उच्च माध्यमिक विद्यालय, पोफाळी आणि *श्री गजानन महाराज भारुडी भजन मंडळ पोफाळी यांच्या संयुक्त विद्यमाने गावात अतिशय उत्साहात आणि भक्तिमय वातावरणात भव्य वारकरी दिंडीचे आयोजन करण्यात आले होते. विद्यार्थ्यांचा अभूतपूर्व उत्साह, टाळ-मृदुंगाचा गजर आणि ‘विठ्ठल रुक्मिणी’च्या जयघोषाने संपूर्ण पोफाळी गाव भक्तिरसात न्हाऊन निघाले होते.
विद्यालयाच्या वर्ग ५ वी ते ७ वीच्या विद्यार्थ्यांनी या दिंडीत उत्स्फूर्तपणे सहभाग घेतला. बालवारकऱ्यांच्या रूपातील मुले-मुली, डोक्यावर तुळशीवृंदावन घेतलेल्या विद्यार्थिनी आणि हातात भगव्या पताका घेतलेले बाल वारकरी संपूर्ण
मिरवणुकीचे मुख्य आकर्षण ठरले.

संत महात्म्यांच्या सोंगांनी वेधले लक्ष

या दिंडीचे विशेष वैशिष्ट्य म्हणजे विद्यार्थ्यांनी धारण केलेली संत महात्म्यांची सोंगे! श्री विठ्ठल-रुक्मिणी, संत ज्ञानेश्वर महाराज, जगद्गुरु संत तुकाराम महाराज आणि संत जनाबाई यांच्या हुबेहूब वेशभूषेत अवतरलेल्या बाल गोपाळांनी उपस्थितांचे लक्ष वेधून घेतले.

गावात सर्वत्र फुगड्या आणि भक्तिमय वातावरण

विद्यालयातून सुरू झालेली ही दिंडी गावातील मुख्य मार्गाने, ग्रामपंचायतीच्या समोरून जात श्री गजानन महाराज मंदिरात पोहोचली.

• दिंडीदरम्यान गावातील विविध चौकांमध्ये बाल वारकऱ्यांनी तल्लीन होऊन ‘फुगडी’ चा आनंद लुटला.
• टाळ-मृदुंगाच्या गजरावर रंगलेला हा भक्तीचा सोहळा पाहून “पोफाळीत जणू प्रत्यक्ष पंढरपूरच अवतरले आहे” असा भास गावकऱ्यांना होत होता.

गावकऱ्यांकडून जागोजागी दिंडीचे भव्य स्वागत

या सोहळ्यात केवळ विद्यार्थीच नव्हे, तर पालकांनी आणि ग्रामस्थांनीही मोठ्या संख्येने हजेरी लावली. गावातील मुख्य रस्त्यांवर व चौकांत गावकऱ्यांनी दिंडीचे जंगी आणि भावूक स्वागत केले. लहान मुलांचे हे भक्तिमय रूप पाहून संपूर्ण पोफाळी गावात आनंदाचे आणि उत्साहाचे वातावरण निर्माण झाले होते.

सर्व विद्यार्थ्यांचे, मुख्याध्यापकांचे, शिक्षकांचे, शिक्षिका आणि सहभागी भजन मंडळाचे परिसरातून कौतुक होत आहे.

सोबत फोटो