नालेसफाई व धुरीकरणासाठी समाजवादी पक्षाचे हिमायतनगर नगरपंचायतीला निवेदन; मुख्याधिकाऱ्यांनी घेतली दखल
हिमायतनगर (तालुका प्रतिनिधी शेख खय्यूम ): शहरातील वाढता डासांचा प्रादुर्भाव, तुंबलेल्या नाल्या आणि साचलेला कचरा यामुळे नागरिकांचे आरोग्य धोक्यात आले आहे. या गंभीर नागरी समस्यांवर तातडीने कायमस्वरूपी उपाययोजना कराव्यात, या मागणीसाठी आज दिनांक २९ जून २०२६ रोजी समाजवादी पक्षाचे हिमायतनगर तालुकाध्यक्ष मोहम्मद अकरम खुरेशी आणि अरबाज खुरेशी यांच्या उपस्थितीत नगरपंचायत प्रशासनाला सविस्तर निवेदन सादर करण्यात आले.
सध्या पावसाळ्याचे दिवस सुरू असल्याने गावातील नाल्या कचऱ्यामुळे पूर्णपणे तुंबल्या आहेत. परिणामी, सांडपाणी वाहून न जाता ते थेट मुख्य रस्त्यांवर पसरत असून सर्वत्र प्रचंड दुर्गंधी सुटली आहे. या घाण पाण्यामुळे डासांची उत्पत्ती मोठ्या प्रमाणावर वाढली असून शहरात डेंग्यू, हिवताप आणि इतर साथीच्या आजारांचा प्रादुर्भाव होण्याची भीती निर्माण झाली आहे. रस्त्यावरून चालताना नागरिकांना आणि लहान मुलांना दुर्गंधीचा व घाणीचा सामना करावा लागत आहे.
या बिकट परिस्थितीचा विचार करून नगरपंचायत प्रशासनाने संपूर्ण शहरात तातडीने धूळ व डास प्रतिबंधक फवारणी (धुरीकरण) करावी, तसेच शहरातील सर्व नाल्यांची योग्य रीतीने साफसफाई करून सांडपाण्याची विल्हेवाट लावावी, अशी आग्रही मागणी मोहम्मद अकरम खुरेशी व उपस्थित पदाधिकाऱ्यांनी केली आहे.
हे निवेदन हिमायतनगर नगरपंचायतीचे मुख्याधिकारी व नगराध्यक्ष यांना प्रत्यक्ष भेटून सुपूर्द करण्यात आले. प्रशासनाने या निवेदनाची गंभीरतेने दखल घेत आवक क्रमांक ७७६० अन्वये अधिकृत नोंद केली आहे. तसेच या निवेदनाच्या प्रती पुढील कारवाई आणि माहितीसाठी जिल्हाधिकारी कार्यालय (नांदेड) व तहसीलदार कार्यालय (हिमायतनगर) यांनाही पाठवण्यात आल्या आहेत. प्रशासनाने यावर तातडीने पावले न उचलल्यास नागरिकांच्या आरोग्याचा प्रश्न अधिक गंभीर होण्याची शक्यता वर्तवली जात आहे.
