हदगाव आणि हिमायतनगर दोन विधानसभा वेगळ्या होणार असल्याची जनतेत चर्चा; आमदारांच्या दुर्लक्षामुळे
हिमायतनगर ग्रामीण रुग्णालयात पाण्यासाठी दूरवरून येणारे गरीब रुग्ण कमालीचे हैराण!
हिमायतनगर (तालुका प्रतिनिधी शेख खय्यूम):
येथील ग्रामीण रुग्णालयाची अवस्था अत्यंत दयनीय आणि संतापजनक झाली आहे. रुग्णालयात टॉयलेट आणि बाथरूम तर बांधण्यात आले आहेत, परंतु प्रशासनाच्या नाकर्तेपणामुळे आणि आमदारांच्या अक्षम्य दुर्लक्षामुळे तिथे वापरण्यासाठी थेंबभरही पाणी उपलब्ध नाही. लोकप्रतिनिधी या गंभीर समस्येकडे ढुंकूनही पाहत नसल्याने नागरिक तीव्र संताप व्यक्त करत आहेत.
सध्या पावसाळ्याचे दिवस असून साथीचे आजार पसरत आहेत. या रुग्णालयात तालुक्याच्या ग्रामीण भागातून आणि दूरवरून मोठ्या संख्येने गरीब रुग्ण उपचारासाठी येतात. अशा परिस्थितीत जर एखाद्या रुग्णाला अचानक शौचालयाची तीव्र गरज भासली (संडास/लायटिंग लागली), तर पाण्याच्या एका थेंबासाठी त्यांनी कुठे जावे? असा संतप्त आणि हतबल करणारा सवाल उपस्थित होत आहे. विशेष म्हणजे, अहोरात्र सेवा देणारे डॉक्टर स्वतः या पाण्याच्या भीषण टंचाईमुळे कमालीचे हैराण झाले आहेत. रुग्णालयातील डॉक्टर आणि लांबून येणाऱ्या गरीब रुग्णांना पिण्यासाठी आणि टॉयलेट-बाथरूम वापरण्यासाठी पाणी मिळत नाहीये. पाणी नसतानाही डॉक्टर प्रामाणिकपणे रुग्णांवर उपचार करत आहेत, मात्र मूलभूत सुविधा पुरवण्यात पूर्णपणे अपयशी ठरलेले स्थानिक प्रशासन आणि आमदारांचे याकडे होत असलेले दुर्लक्ष या बिकट परिस्थितीला जबाबदार असल्याचे बोलले जात आहे.
राजकीय समीकरणांमुळे हिमायतनगरवर सावत्रपणाचा अन्याय?
हदगाव आणि हिमायतनगर हे दोन विधानसभा मतदारसंघ वेगळे होणार असल्याची जोरदार चर्चा सध्या जनतेमध्ये सुरू आहे. दोन विधानसभा वेगळ्या होत असल्याच्या याच पार्श्वभूमीवर आमदारांचे हिमायतनगरकडे पूर्णपणे (दूरलक्ष) होत आहे का? असा थेट सवाल आता जनतेतून विचारला जात आहे. एकीकडे हदगाव तालुक्यात विविध विकासकामांचा सपाटा सुरू असताना, तालुक्याचे मुख्य केंद्र असलेल्या हिमायतनगरच्या या अत्यंत महत्त्वाच्या ग्रामीण रुग्णालयाला मात्र वाऱ्यावर सोडण्यात आले आहे. डॉक्टर आणि दूरवरून येणारे गरीब रुग्ण पाण्यासाठी हैराण असताना आमदार याकडे लक्ष का देत नाहीत? हदगाववर मेहेरबानी आणि हिमायतनगरवर हा सावत्रपणाचा अन्याय का? असा सवाल आता सामान्य जनता विचारत आहे. या गंभीर प्रकाराची वरिष्ठ अधिकाऱ्यांनी दखल घेऊन तात्काळ पाण्याची सोय करावी, अन्यथा तीव्र आंदोलन छेडण्यात येईल असा इशारा नागरिकांनी दिला आहे.
