हिमायतनगर: श्री परमेश्वर यात्रेत कुस्तीचा थरार; विजेत्या पैलवानाला चांदीची गदा व रोख पारितोषिक
हिमायतनगर ( तालुका प्रतिनिधी शेख खयुम):
येथील श्री परमेश्वर देवस्थान यात्रेनिमित्त स्व. परमेश्वर शिंदे यांच्या स्मरणार्थ भव्य कुस्ती स्पर्धेचे आयोजन करण्यात आले आहे. यात्रेच्या अंतिम टप्प्यात आयोजित या कुस्ती स्पर्धेचा शुभारंभ नगराध्यक्ष शेख रफिकभाई, उपनगराध्यक्ष विनोद गुंडेवार आणि पोलीस निरीक्षक अमोल भगत यांच्या हस्ते उत्साहात करण्यात आला.
विजेत्यांना विशेष बहुमान:
या कुस्ती स्पर्धेचे मुख्य आकर्षण म्हणजे विजेत्या पैलवानाला पत्रकार नागेश शिंदे यांच्याकडून विशेष बक्षीस देण्यात येणार आहे. यामध्ये मानाची चांदीची गदा आणि रोख रक्कम देऊन पैलवानाचा गौरव केला जाणार आहे.
मान्यवरांची मांदियाळी:
स्पर्धेच्या उद्घाटन प्रसंगी मंदिर ट्रस्टचे उपाध्यक्ष महाविरचंद श्रीश्रीमाळ, सचिव अनंता देवकते, नगरसेवक डॉ. राजेंद्र वानखेडे, समद खान, सरदार खान, अब्दुल कलीम आणि संचालक मंडळाची प्रमुख उपस्थिती होती.
प्रेक्षकांचा प्रतिसाद:
या स्पर्धेसाठी पंचक्रोशीतील अनेक नामवंत पैलवानांनी मैदानात हजेरी लावली आहे. ढोल-ताशांच्या गजरात आणि कुस्ती शौकिनांच्या प्रचंड गर्दीत हे मैदान चांगलेच गाजत आहे. स्व. परमेश्वर शिंदे यांच्या आठवणींना उजाळा देण्यासाठी आयोजित ही स्पर्धा यात्रेचे मुख्य आकर्षण ठरली आहे.
