वकिलांच्या परिषदेत ज्येष्ठ कायदेतज्ज्ञांकडून महत्त्वपूर्ण कायदेशीर मागण्या व सूचना

सहसंपादक शेख मुजाहिद

‘इनोसंट नेटवर्क’ (Innocent Network) च्या वतीने हॉटेल अतिथी, पुसद (महाराष्ट्र) येथे ‘वकिलांची बैठक’ (Lawyers Meet) या शीर्षकाखाली एका महत्त्वपूर्ण आणि प्रतिष्ठित कायदेशीर चर्चासत्राचे आयोजन करण्यात आले होते. या परिषदेत देशातील सद्यस्थिती, वकिलांच्या जबाबदाऱ्या आणि निरपराध कैद्यांना कायदेशीर मदत यांसारख्या अत्यंत संवेदनशील विषयांवर सविस्तर चर्चा करण्यात आली. या कार्यक्रमाला विधी क्षेत्रातील अनेक नामांकित व्यक्ती, विचारवंत, पत्रकार आणि सामाजिक कार्यकर्ते उपस्थित होते.
कार्यक्रमाची अधिकृत सुरुवात पवित्र कुराण पठण आणि त्याच्या अनुवादाने झाली, त्यानंतर फैज अहमद फैज यांचे एक प्रेरणादायी आणि उत्साहवर्धक गीत सादर करण्यात आले.
प्रास्ताविक भाषणात अँडवोकेट आदिल मिर्झा यांनी कार्यक्रमाचा उद्देश स्पष्ट केला आणि ‘इनोसंट नेटवर्क’ची ओळख करून दिली. आजच्या काळात शोषित व पीडितांना वेळेवर कायदेशीर मदत पुरवणे आणि त्यांच्या हक्कांसाठी आवाज उठवणे किती गरजेचे झाले आहे, यावर त्यांनी प्रकाश टाकला.
सध्याची परिस्थिती आणि वकिलांची भूमिका या विषयावर बोलताना ॲडव्होकेट शहजाद पठाण(मुंबई) यांनी आपले विचार व्यक्त केले. आजच्या आव्हानात्मक काळात वकिली हा केवळ एक व्यवसाय नसून, समाजसुधारणा आणि न्यायव्यवस्था टिकवून ठेवण्यासाठी वकिलांना संरक्षकाची भूमिका बजवावी लागेल, यावर वक्त्यांनी भर दिला. प्रा. आकीब यांनी न्यायव्यवस्थेची सद्यस्थिती अत्यंत मार्मिक आणि प्रभावी शब्दांत मांडली.
कार्यक्रमाचे मुख्य वक्ते आणि ‘इनोसंट नेटवर्क’चे संस्थापक डॉ. वाहिद शेख यांनी ‘निरपराध कैदी आणि वकिलांचे महत्त्व’ या विषयावर अत्यंत अभ्यासपूर्ण व विचार करायला लावणारे व्याख्यान दिले. तुरुंगात बंदिस्त असलेल्या निरपराध लोकांच्या यातनांचा उल्लेख करत ते म्हणाले की, ‘अशा निष्पाप लोकांना तुरुंगातून बाहेर काढण्यासाठी आणि त्यांना न्याय मिळवून देण्यासाठी संवेदनशील व प्रामाणिक वकिलांची भूमिका सर्वात महत्त्वाची असते.’ यादरम्यान त्यांनी एक २० कलमी अजेंडा (प्रस्ताव) सादर केला आणि वकिलांनी यावर गांभीर्याने विचार करावा, अशी आशा व्यक्त केली. या दोन कार्यक्रमांनंतर स्थानिक जनतेशी चर्चा करून अकोला आणि पुसद येथे ‘इनोसंट नेटवर्क’चे नवीन चॅप्टर (शाखा) सुरू करण्यात आले असल्याचे डॉ. वाहिद शेख यांनी सांगितले.
त्यांनी कायदेशीर क्षेत्रातील मंडळींना अशा प्रकरणांमध्ये मोठ्या संख्येने पुढे येण्याचे आवाहन केले. उपस्थित ज्येष्ठ वकिलांनीही अशा प्रकारच्या जनजागृतीपर कार्यक्रमांचे आयोजन सर्वत्र केले जावे, अशी इच्छा व्यक्त केली.
आभार प्रदर्शन, स्नेहभोजन आणि देश व समाजाच्या शांतता व सुरक्षिततेसाठी केलेल्या प्रार्थनेने या परिषदेची सांगता झाली.