महागाव प्रतिनिधी |संजय नागरगोजे
21 फेब्रुवारी 2026
श्री क्षेत्र माहूर तालुक्यातील अंजनखेड येथे Cotton Connect (अमेरिका) या सेवाभावी संस्थेच्या माध्यमातून भव्य महिला शेतकरी मेळावा उत्साहात पार पडला. या मेळाव्यास उद्घाटक म्हणून स्वाभिमानी शेतकरी संघटनेचे शेतकरी नेते मनीष जाधव उपस्थित होते, तर अध्यक्षस्थानी नांदेड जिल्ह्यातील उपेक्षितांचे लढाऊ नेतृत्व ज्योतिबा दादा खराटे होते.
कार्यक्रमाची सुरुवात मासाहेब जिजाऊ, सावित्रीबाई फुले आणि इलाबेन भट्ट यांच्या प्रतिमांचे पूजन व दीपप्रज्वलनाने करण्यात आली. उपस्थित मान्यवरांचा शाल, श्रीफळ व सन्मानचिन्ह देऊन सत्कार करण्यात आला. जिल्हा समन्वयक विलास भाऊ चव्हाण यांनी कार्यक्रमाचे उत्कृष्ट नियोजन केले.
🗣️ “कृषी संस्कृतीचा शोध ही महिलांची देण”
आपल्या भाषणात मनीष जाधव यांनी ठामपणे सांगितले की,
“कृषी संस्कृतीचा शोध ही महिलांची देण आहे. शेतीतील श्रमाचे योगदान पुरुषांपेक्षा अधिक असून समर्पणाचे दुसरे नाव म्हणजे स्त्री.”
त्यांनी केंद्र व राज्य शासनाच्या धोरणांवर टीका करताना म्हटले की, वाढलेला उत्पादन खर्च आणि शेतमालाला न मिळणारा योग्य भाव यामुळे शेती तोट्यात जात आहे. शेतकरी आत्महत्यांच्या प्रश्नावर शासन गांभीर्य दाखवत नसल्याची खंत त्यांनी व्यक्त केली. शक्तीपीठ महामार्गासाठी भूसंपादन करताना परभणी जिल्ह्यातील शेतकऱ्यांशी होत असलेल्या वागणुकीबद्दलही त्यांनी चिंता व्यक्त केली.
🌱 सेंद्रिय शेती व आरोग्यावर भर
महिलांना संबोधित करताना त्यांनी आवाहन केले की—
कुटुंबासाठी विषमुक्त सेंद्रिय फळभाजी लागवड करावी.
अनावश्यक रासायनिक खत व कीटकनाशकांचा वापर टाळावा.
माती परीक्षण करून आवश्यक तेवढ्याच खतांचा वापर करावा.
दशपर्णी, जीवामृत यांसारख्या नैसर्गिक जैवविविध साधनांचा उपयोग करावा.
महिलांनी स्वतःच्या आरोग्याकडे लक्ष देत नियमित तपासणी करून घ्यावी.
शेतीपूरक लघुउद्योगातून आर्थिक सबलीकरण साधावे.
महाराष्ट्र कीटकनाशक उत्पादनाचे हब बनत असल्याची खंत व्यक्त करत त्यांनी याचा आरोग्यावर होणाऱ्या परिणामांविषयी इशारा दिला.
👩🌾 महिलांची उत्स्फूर्त उपस्थिती
या मेळाव्यास हजारोंच्या संख्येने महिला शेतकरी उपस्थित होत्या. कृषी सखी आणि कॉटन कनेक्टच्या माध्यमातून महिलांचे सबलीकरण देश-विदेशात पोहोचल्याचे त्यांनी नमूद केले. स्त्री ही सर्जक आणि कुटुंबाचा आधारस्तंभ असल्याने प्रत्येक क्षेत्रात महिलांनी आघाडी घ्यावी, असेही त्यांनी सांगितले.
कार्यक्रम मोठ्या उत्साहात आणि शिस्तबद्ध नियोजनात पार पडला.
