महागाव नगरपंचायतीच्या विकासकामांवर गंभीर प्रश्नचिन्ह; आमदार निधीतील कोट्यवधींची कामे कागदावरच!निवडणुका डोळ्यासमोर ठेवून भूमिपूजनाचा सपाटा? निकृष्ट कामांमुळे ‘क्वालिटी कंट्रोल’ चौकशीची मागणी

महागाव प्रतिनिधी संजय नागरगोजे:

महागाव नगरपंचायत क्षेत्रात आमदार निधीतून मंजूर झालेल्या विकासकामांच्या अंमलबजावणीवर आणि गुणवत्तेवर आता गंभीर प्रश्नचिन्ह उभे राहिले आहे. मोठ्या थाटामाटात भूमिपूजने होऊनही अनेक कामे अद्याप थंड बस्त्यात असल्याने, विकासकामांचा उद्देश नागरिकांच्या समस्या सोडवणे नसून केवळ निवडणुका डोळ्यासमोर ठेवून ‘क्रेडिट’ घेणे आहे की काय, असा संशय नागरिक व्यक्त करत आहेत.
भूमिपूजन झाले, पण निधी गायब?
महागावात अनेक महत्त्वाच्या कामांची घोषणा आणि भूमिपूजन झाले, पण प्रत्यक्षात कामे सुरू झाली नाहीत.
प्रभाग एकमध्ये रोड: माजी आमदार ससाने आणि नितीन भुतडा यांच्या उपस्थितीत भूमिपूजन होऊनही काम सुरू नाही.
ग्रामीण रुग्णालय (फुल सांग): भूमिपूजन होऊनही निधी उपलब्ध नसल्याने काम थांबले आहे.
अंबोडा देवस्थान: आमदार निधीतून मंजूर झालेले एक कोटी रुपयांचे काम केवळ कागदावरच असल्याचे उघड झाले आहे.
केवळ निवडणुकांपूर्वी घोषणा करून नागरिकांची फसवणूक केली जात असल्याचा आरोप नागरिकांनी केला आहे.
४० लाखांचा अपहार; निकृष्ट दर्जाचे कामे उघड
ज्या ठिकाणी कामे पूर्ण झाली आहेत, तिथे कामांचा दर्जा अत्यंत निकृष्ट असल्याच्या तक्रारी आहेत.
निकृष्ट सिमेंट रोड: धरनकर यांच्या घरापासून जिनिंग प्रेसिंगपर्यंत करण्यात आलेला सिमेंट रोड अत्यंत निकृष्ट दर्जाचा असल्याचे नागरिकांचे म्हणणे आहे.
साई मंदिर कंपाऊंड: दहा लाखांचा निधी मंजूर असूनही साई मंदिर वॉल कंपाऊंडचे काम अर्धवट आणि निकृष्ट दर्जाचे झाले आहे.
यापेक्षा गंभीर बाब म्हणजे, सुमारे दोन कोटी रुपयांच्या रोड कामांमध्ये गैरव्यवहार झाल्याचा आरोप आहे. पुरी यांच्या घरापासून संजय भगत यांच्या घरापर्यंत यापूर्वी झालेल्या रोडवर पुन्हा नवीन रोड टाकून चाळीस लाखांचा भ्रष्टाचार केल्याची धक्कादायक तक्रार समोर आली आहे.
ठेकेदार-अधिकारी साटेलोटे; गुणवत्ता पार खालावली
विकास निधीचा उपयोग केवळ भ्रष्टाचारासाठी केला जात असल्याचे चित्र महागावात दिसत आहे. मंजूर झालेली कामे मूळ ठेकेदार दुसऱ्या ठेकेदारांना टक्केवारी देऊन विकत आहेत. यामुळे अधिकारी आणि ठेकेदार मालामाल होत आहेत, पण कामांची गुणवत्ता पार खालावत आहे. बांधकाम विभागाच्या नियोजनशून्य कारभारावरही नागरिकांनी बोट ठेवले आहे.
नागरिकांकडून ‘क्वालिटी कंट्रोल’ आणि चौकशीची मागणी
शासनाच्या निधीचा अपहार थांबवण्यासाठी महागावच्या नागरिकांनी आता आक्रमक भूमिका घेतली आहे. त्यांनी तातडीने ‘क्वालिटी कंट्रोल’ मार्फत नगरपंचायत हद्दीत झालेल्या सर्व रोड कामांची पाहणी करूनच बिले काढण्याची मागणी केली आहे.
तसेच, संबंधित बांधकाम विभागाचे अधिकारी आणि जेई (JE) यांनी ठेकेदारांशी संगनमत करून बिल काढण्याच्या बेतात असलेल्या कामांची चौकशी करून मुख्य नगरपरिषद अधिकाऱ्यांनी निकृष्ट दर्जाचे रोडची पाहणी करून यावर तातडीने अहवाल सादर करावा, अशी मागणीही नागरिकांनी लावून धरली आहे.