नांदेड-भोकर अपघातातील जखमी शेख जलील यांची अशोकराव चव्हाण यांच्याकडून विष्णुपुरी रुग्णालयात भेट; ५० हजारांची मदत ७ ते १५ दिवसांत खात्यात जमा होणार

​ ( प्रतिनिधी शेख खय्यूम):
नांदेड-भोकर-हिमायतनगर महामार्गावरील वाकद फाट्याजवळ ट्रक आणि मॅजिक प्रवासी वाहनाची समोरासमोर जोरदार धडक होऊन भीषण अपघात घडला. या अपघातात ८ जणांचा मृत्यू झाला असून ६ जण गंभीर जखमी झाले आहेत.
​खासदार अशोकराव चव्हाण यांनी घेतली जखमी शेख जलील यांची भेट:
अपघाताची माहिती मिळताच माजी मुख्यमंत्री तथा राज्यसभा खासदार अशोकराव चव्हाण यांनी आज नांदेड येथील विष्णुपुरी शासकीय वैद्यकीय महाविद्यालय व रुग्णालयात (GMCH) भेट दिली. त्यांनी तेथे उपचाराधीन असलेले हिमायतनगरचे रहिवासी शेख जलील यांची प्रत्यक्ष भेट घेतली. यावेळी चव्हाण यांनी रुग्णालयात उपस्थित असलेल्या शेख जलील यांच्या मुलाकडे “तब्बेत कशी आहे?” अशी आपुलकीने विचारपूस करून धीर दिला, तसेच उपचाराधीन जखमींवर तात्काळ मोफत व योग्य उपचार करण्याचे कडक निर्देश डॉक्टरांना दिले.
​पंतप्रधान मदत निधी व प्रशासकीय प्रक्रिया:
​मदतीचे स्वरूप: पंतप्रधान राष्ट्रीय मदत निधीतून (PMNRF) मृतांच्या वारसांना प्रत्येकी २ लाख रुपये तर गंभीर जखमींना ५० हजार रुपये सानुग्रह मदत जाहीर करण्यात आली आहे.
​मदत मिळण्याचा कालावधी: ही मदत किती दिवसांत मिळते? असा प्रश्न बाधितांकडून विचारला जात होता. त्यावर पोलीस पंचनामे व कागदपत्रांची पडताळणी पूर्ण करून पुढील ७ ते १५ दिवसांच्या आत ही रक्कम थेट बाधितांच्या बँक खात्यात (DBT द्वारे) जमा केली जाईल, असे प्रशासनाने स्पष्ट केले.
​प्रशासकीय आदेश: पंतप्रधान कार्यालयाच्या (PMO) सूचनेनुसार नांदेड जिल्हाधिकारी, पोलीस प्रशासन व तहसीलदारांना ही मदत तातडीने वितरीत करण्याचे व सर्व कायदेशीर सोपस्कार त्वरित पूर्ण करण्याचे कडक निर्देश देण्यात आले आहेत.