५० पैकी तब्बल ४८ विद्यार्थी गैरहजर; दोन विद्यार्थ्यांच्या नावावर चार शिक्षकांचा ‘कारभार’?

महागाव प्रतिनिधी संजय नागरगोजे
महागाव : महागाव येथील स्व. सदाशिवराव इंगळे अपंग मतिमंद निवासी विद्यालयाच्या कारभाराबाबत गंभीर प्रश्नचिन्ह निर्मा झाले आहे. विद्यालयात ५० विद्यार्थी दाखल असताना गेल्या वर्षभरापासून तब्बल ४८ विद्यार्थी सतत गैरहजर असल्याची बाब समोर आली आहे. प्रत्यक्ष पाहणीदरम्यान केवळ दोन विद्यार्थी उपस्थित आढळल्याने विद्यालयाच्या कामकाजाबाबत विविध प्रश्न उपस्थित झाले आहेत.
उपलब्ध माहितीनुसार, शिवम दत्ता पोटे आणि शिवराज गजानन बेलखेडे हे दोन विद्यार्थी विद्यालयात उपस्थित होते. मात्र, ५० पैकी ४८ विद्यार्थी गैरहजर असताना चार शिक्षक विद्यालयात उपस्थित असल्याचे निदर्शनास आले. त्यामुळे शासनाकडून विद्यालयाला मिळणारे अनुदान, विद्यार्थ्यांची प्रत्यक्ष उपस्थिती आणि विद्यालयातील कर्मचारी याबाबत सखोल चौकशी करण्याची मागणी होत आहे.
४८ विद्यार्थी गैरहजर; सुट्टीचे कारण काय?
विद्यालयाची पाहणी करण्यासाठी पत्रकारांनी प्रत्यक्ष भेट दिल्यानंतर ४८ विद्यार्थी गैरहजर का आहेत, याबाबत शिक्षक व कर्मचाऱ्यांना विचारणा करण्यात आली. यावेळी पालकांच्या विनंतीवरून विद्यार्थ्यांना सुट्टी देण्यात आल्याचे सांगण्यात आल्याची माहिती आहे. मात्र, एवढ्या मोठ्या संख्येने विद्यार्थी सलग गैरहजर असताना त्यांच्या सुट्टीची अधिकृत नोंद, पालकांची परवानगी आणि संबंधित शासकीय नियमांचे पालन झाले आहे का, हा प्रश्न उपस्थित होत आहे.

पोषण आहारावरही प्रश्नचिन्ह
विद्यालयातील विद्यार्थ्यांच्या पोषण आहाराबाबतही प्रश्न उपस्थित झाले आहेत. पाहणीदरम्यान केवळ खिचडी आढळून आल्याचे सांगण्यात आले. निवासी विद्यालयातील विद्यार्थ्यांना नियमानुसार मिळणारा आहार, त्याची गुणवत्ता, प्रमाण तसेच प्रत्यक्ष वितरण याची तपासणी करण्याची मागणी होत आहे.
चार शिक्षक हजर; मुख्याध्यापक गैरहजर
पाहणीच्या वेळी ए. बी. चिंचोलकर, एस. एस. पुरी, वीरेंद्र नामदेव इसाळकर आणि उमेश माधव शेंडे हे चार शिक्षक उपस्थित असल्याचे सांगण्यात आले. तर मुख्याध्यापक जाधव हे गैरहजर असल्याचे निदर्शनास आले.
५० विद्यार्थ्यांच्या नावावर धान्य उचल?
विद्यालयातील ५० विद्यार्थ्यांच्या नावावर अन्नधान्याची उचल होत असल्याचा आरोपही करण्यात आला आहे. प्रत्यक्षात केवळ दोन विद्यार्थी उपस्थित असताना उर्वरित विद्यार्थ्यांच्या नावावर किती धान्य उचलले जाते, त्याचा वापर कसा केला जातो आणि त्याची नोंद कुठे आहे, याची तपासणी होणे आवश्यक आहे.
पुरवठा विभागाकडून विद्यार्थ्यांच्या संख्येनुसार धान्याचा पुरवठा होत असल्यास संबंधित पुरवठा निरीक्षकांनी विद्यालयाची प्रत्यक्ष पाहणी केली आहे का, असा सवालही उपस्थित केला जात आहे. विद्यार्थ्यांच्या संख्येत आणि प्रत्यक्ष उपस्थितीत एवढी मोठी तफावत असताना संबंधित विभागाने याची दखल घेतली नसल्यास ही बाब गंभीर असल्याचे नागरिकांचे म्हणणे आहे.
प्रशासनाने तातडीने चौकशी करावी
५० पैकी ४८ विद्यार्थी गैरहजर, केवळ दोन विद्यार्थी उपस्थित आणि चार शिक्षक हजर, अशी परिस्थिती असल्याने विद्यालयाचा कारभार नेमका कसा चालतो, याची सखोल चौकशी करण्याची मागणी होत आहे.
संबंधित समाजकल्याण विभागाने विद्यार्थ्यांची उपस्थिती नोंदवही, पालकांच्या परवानग्या, सुट्टीच्या नोंदी, शिक्षकांची उपस्थिती, शासनाकडून मिळणारे अनुदान, अन्नधान्याची उचल, पोषण आहाराची बिले आणि प्रत्यक्ष वितरण यांची तातडीने तपासणी करावी. चौकशीत अनियमितता आढळल्यास संबंधितांवर नियमानुसार कारवाई करावी, अशी मागणी नागरिकांकडून होत आहे.
दरम्यान, या आरोपांबाबत विद्यालय प्रशासन व संबंधित अधिकाऱ्यांची अधिकृत बाजू अद्याप समोर आलेली नाही. त्यामुळे चौकशीनंतरच आरोपांची सत्यता स्पष्ट होणार आहे.