जलजीवन मिशन योजनेतील कथित त्रुटी व भ्रष्टाचारामुळे गाव पाण्यापासून वंचित? ग्रामस्थांचा गंभीर आरोप
महागाव प्रतिनिधी : संजय नागरगोजे
महागाव तालुक्यातील मौजा घानमुख येथे भीषण पाणीटंचाई निर्माण झाली असून पिण्याच्या पाण्यासाठी ग्रामस्थांना १ ते २ किलोमीटरपर्यंत भटकंती करावी लागत आहे. ऐन उन्हाळ्यात पाण्यासाठी होणारी वणवण आणि प्रशासनाच्या कथित दुर्लक्षामुळे ग्रामस्थांमध्ये तीव्र संताप निर्माण झाला आहे.
ग्रामस्थांनी गटविकास अधिकारी, पंचायत समिती महागाव यांना निवेदन सादर करून तातडीने पाणीपुरवठ्याची व्यवस्था करण्याची मागणी केली आहे. निवेदनानुसार, गावातील महिला, लहान मुले आणि ज्येष्ठ नागरिकांना कडक उन्हात पाण्यासाठी पायपीट करावी लागत असून, अनेकदा पुरेसे पिण्याचे पाणीही उपलब्ध होत नाही. त्यामुळे ग्रामस्थांचे दैनंदिन जीवन विस्कळीत झाले आहे.
दरम्यान, गावात राबविण्यात आलेल्या जलजीवन मिशन योजनेबाबतही ग्रामस्थांनी गंभीर प्रश्न उपस्थित केले आहेत. योजनेअंतर्गत पाणीपुरवठ्यासाठी मोटार बसविण्यात आली; मात्र आवश्यक वीजपुरवठ्यासाठी डीपी व विद्युत जोडणीची व्यवस्था करण्यात आली नसल्याचा आरोप करण्यात आला आहे. परिणामी लाखो रुपयांचा खर्च होऊनही योजना प्रत्यक्षात कार्यान्वित झाली नसल्याचे ग्रामस्थांचे म्हणणे आहे.
ग्रामस्थांनी जलजीवन मिशनचे संबंधित अधिकारी, अभियंते आणि ठेकेदार यांच्या कार्यपद्धतीवरही प्रश्नचिन्ह उपस्थित केले असून, योजनेतील कथित अनियमितता व निष्काळजीपणामुळे गाव आजही पिण्याच्या पाण्यापासून वंचित असल्याचा आरोप केला आहे. या संपूर्ण प्रकरणाची चौकशी करून दोषींवर कारवाई करण्यात यावी, अशी मागणीही करण्यात आली आहे.
पाणीटंचाईच्या प्रश्नाकडे प्रशासनाचे लक्ष वेधण्यासाठी ग्रामस्थांनी पंचायत समिती महागाव कार्यालयावर घागर मोर्चा काढण्याचा इशारा दिला आहे. पाणीप्रश्न तातडीने निकाली काढण्यात आला नाही तर आंदोलन अधिक तीव्र करण्यात येईल, असा इशाराही निवेदनातून देण्यात आला आहे.
घानमुख गावातील पाणीटंचाई, जलजीवन मिशनच्या कामांची गुणवत्ता आणि ग्रामस्थांच्या आरोपांबाबत संबंधित प्रशासनाची भूमिका अद्याप समोर आलेली नसून, आता पंचायत समिती व संबंधित विभाग यावर काय निर्णय घेतात याकडे संपूर्ण परिसराचे लक्ष लागले आहे.
