शेख मुजाहिद
सहसंपादक मो.7798306192
उमरखेड, ता. ५ : दहशत निर्माण करणाऱ्या मनोरुग्णाला पकडण्यासाठी ठाणेदारासह पोलिस कर्मचारी गेले असता मनोरुग्णाने त्यांच्यावरच प्राणघातक हल्ला करीत पोलिस कर्मचाऱ्यास गंभीर जखमी केले. ही घटना दोन फेब्रुवारीला रात्री अकराच्या सुमारास तालुक्यातील बिटरगाव पोलिस ठाण्याअंतर्गत येणाऱ्या मोरचंडी गावात घडली.
दरम्यान, या घटनेत पोलिसांनी जिवाची बाजी लावीत मनोरुग्णाला पकडताना त्याच्या दहशतीत असलेल्या गावकऱ्यांनी कोणतेही सहकार्य न केल्याने आश्चर्य व्यक्त केले जात आहे.
मोरचंडी गावातील विजय राठोड हा हातात काठी व गज घेऊन दहशत पसरत असल्याची माहिती पोलिस पाटलांनी
बिटरगाव पोलिस ठाण्यात दिली. त्यानंतर जमादार दत्ता कवडेकर व प्रवीण चव्हाण हे गावात गेल्यावर विजय राठोड हनुमान मंदिरात असल्याचे समजले. पोलिस कर्मचारी त्याला पकडण्यास गेले असता, त्याने मंदिरातील घंटा पोलिस कर्मचाऱ्यावर फेकून मारला. त्यात जमादार दत्ता कवडेकर गंभीर जखमी झाले. याबाबतची माहिती मिळाल्यावर ठाणेदार प्रेमकुमार केदार हे कर्मचारी हिमंत जाधव, प्रकाश मुंडे व अंबादास गारोळे यांच्यासह मोरचंडीला आले. त्यावेळी लाकडाने राठोड याने ठाणेदारांवर हल्ला केला. परंतु त्याला सिताफिने ठाणेदारांनी व कर्मचाऱ्यांनी ताब्यात घेतले. त्यानंतर हातपाय बांधून त्याला शांत करीत नातेवाइकांच्या स्वाधीन केले व पुढील उपचारासाठी त्याला नांदेडला रवाना करण्यात आले.
