महागाव प्रतिनिधी : संजय नागरगोजे
पुसद येथील जिल्हा परिषद बांधकाम विभाग क्रमांक २ मधील उपअभियंता सतीश नांदागवकर यांच्या कामकाजाबाबत गंभीर प्रश्नचिन्ह निर्माण झाले आहे. अधिकृत कार्यालयाऐवजी विश्रामगृहातूनच शासकीय कामकाज सुरू असल्याचे धक्कादायक चित्र समोर आले आहे.
मिळालेल्या माहितीनुसार, संबंधित उपअभियंता अधिकृत कार्यालयात अनुपस्थित असून “साहेब सुट्टीवर आहेत” असे कारण दिले जात आहे. मात्र दुसरीकडे, पुसद येथील विश्रामगृहाच्या वरच्या मजल्यावरील खोली क्रमांक २ मध्ये विविध शासकीय विकासकामांची बिले काढण्यासाठी ठेकेदारांच्या रांगा लागल्याचे दिसून येत आहे. काही ठिकाणी कामे पूर्ण न करताच किंवा अर्धवट असतानाही बिले काढण्याचा प्रयत्न होत असल्याची चर्चा रंगली आहे.
सध्या मार्च एंडिंगचा कालावधी सुरू असल्यामुळे बिल काढण्याचा वेग वाढला आहे. पुसद व महागाव येथे कोट्यवधी रुपयांची विकासकामे सुरू असून, अनेक कामे अपूर्ण किंवा अर्धवट असतानाच बिले मिळवण्यासाठी ठेकेदारांकडून मोठी धावपळ सुरू असल्याचे समजते.
या पार्श्वभूमीवर, अधिकृत कार्यालय बाजूला ठेवून विश्रामगृहातून कामकाज सुरू असल्यामुळे आर्थिक देवाणघेवाणीबाबत संशय व्यक्त केला जात आहे. शासनाने बहाल केलेले कार्यालय टाळून अनधिकृतपणे शासकीय कामकाज सुरू असल्याचा प्रकार गंभीर मानला जात आहे.
दरम्यान, सामाजिक कार्यकर्त्यांकडून या प्रकरणाची तक्रार लाचलुचपत प्रतिबंधक विभाग (ACB) तसेच वरिष्ठ अधिकाऱ्यांकडे करण्याची तयारी सुरू असल्याची माहिती आहे. संबंधित अधिकाऱ्याची सखोल चौकशी करून कठोर कारवाई करण्यात यावी, अशी मागणी आता जोर धरत आहे.
