उमरखेड तालुका पुरग्रस्त : शेतकऱ्यांचे घामाचे पीक पाण्यात, हजारो कुटुंबं बेघर – शासनाकडे न्यायाची आर्त हाक

मुख्य संपादक

उमरखेड (17 ऑगस्ट) :
आकाशातून कोसळलेल्या पावसाने आणि नदी-नाल्यांना आलेल्या पुराच्या प्रचंड लाटेने उमरखेड तालुक्यात शेतकरी आणि जनतेचे सर्वस्व हिरावून नेले. 15 व 16 ऑगस्ट रोजी झालेल्या मुसळधार पावसामुळे 77,560 हेक्टरवरील पिके उद्ध्वस्त झाली आहेत, तर 52,340 शेतकरी बाधित झाले आहेत. शेतकऱ्यांनी जीव तोडून उभा केलेला कापूस, सोयाबीन, हळद, मका, तुर आणि ऊस डोळ्यांसमोर पाण्यात वाहून गेल्याने त्यांच्या चेहऱ्यावर अश्रूंचे धबधबे दिसत आहेत.

पावसाची विक्रमी नोंद – शेती वस्तीचे उद्ध्वस्त चित्र
दोन दिवसात झालेल्या अतिवृष्टीने तालुक्याचा सरासरी पाऊस 126 टक्क्यांपेक्षा अधिक झाला आहे. निंगनूर, ढाणकी, चातारी, बिटरगावसारख्या मंडळांत तब्बल 330 ते 370 मि.मी. पाऊस नोंदला गेला. पुराच्या पाण्याने शेतकरी कुटुंबांचे शिवारच नव्हे तर घराचे कौल, ओटी, संसाराची साधनं आणि चुली-बांधणं देखील वाहून नेलं.

हजारो कुटुंबं उघड्यावर – जनतेचा आक्रोश
44 गावांत 2709 कुटुंबांचे घरांत पाणी शिरले. घरगुती वस्तू, कपडे, धान्य, जनावरांचे खाद्य – सगळं वाहून गेलं. लहान लेकरं, वृद्ध, स्त्रिया यांना घरदार सोडून सुरक्षित ठिकाणी जावं लागलं. गावोगावी लोकं उघड्यावर आहेत. “शेतात पिकं नाही, घरात अन्न नाही, सरकारनं आता तरी आम्हाला खराखुरा आधार द्यावा” अशी आर्त हाक शेतकरी व नागरिक देत आहेत.

📑 प्रशासनाचा अहवाल जिल्हाधिकाऱ्यांकडे – मदतीचे आश्वासन
तहसीलदार उमरखेड यांनी सांगितले की, प्राथमिक अहवाल जिल्हाधिकाऱ्यांकडे पाठविला असून सविस्तर पंचनामा सुरू आहे. “शेतकरी आणि बाधित कुटुंबांना शासनाकडून तातडीचा दिलासा मिळावा यासाठी प्रयत्न सुरू आहेत” असे त्यांनी स्पष्ट केले.

जनतेची मागणी – खऱ्या मोबदल्याची गरज
पूरामुळे उद्ध्वस्त झालेल्या शेतकऱ्यांना व नागरिकांना केवळ कागदोपत्री मदत नको, तर वास्तविक व पुरेसा मोबदला हवा आहे. शासनाने शेतकऱ्यांच्या घामाचा, घरांच्या स्वप्नांचा आणि जनतेच्या जिवनाचा विचार करून न्याय द्यावा, हीच अपेक्षा आता सर्वांची आहे.